శ్రీకాకుళం జిల్లా కాశీబుగ్గ ఎస్‌ఐ శిరీష గుర్తు తెలియని మృతదేహాన్ని తన భుజాలపై మోసుకెళ్లి మానవత్వాన్ని చాటుకున్న ఆమెపై ప్రశంసలు కురిపిస్తున్నారు. ఏపీ డీజీపీ గౌతమ్ సవాంగ్‌తో పాటూ తెలంగాణా నుంచి కూడా అభినందనలు వెల్లువెత్తుతున్నాయి. సోషల్ మీడియాలో నెటిజన్లు ఆమెను ఓ ఇన్సిపిరేషన్‌గా తీసుకుంటున్నారు.
తాజాగా ఎస్సైపై శిరీషను తెలంగాణ బీజేపీ నేత విజయశాంతి అభినందించారు. ‘ఎన్ని ప్రతికూలతలు ఎదురైనా ధైర్యంగా ఎదుర్కొని విధి నిర్వహణలో ముందుకు సాగుతున్న కాశీబుగ్గ ఎస్‌ఐ కొత్తూరు శిరీషకు నా అభినందనలు’అంటూ ట్వీట్ చేశారు. తాను నటించిన కర్తవ్యం సినిమా ప్రేరణతో ఓ తండ్రి తన కూతురిని సమాజం మెచ్చే పోలీస్ అధికారిణిగా తీర్చిదిద్దడం తనకెంతో ఆనందాన్ని ఇచ్చిందని ప్రశంసలు కురిపించారు.
విజయశాంతి నటించిన కర్తవ్యం సినిమా 1990లో విడుదలైంది. ఈ సినిమా రాములమ్మకు మంచి పేరు తీసుకొచ్చింది. సూర్య మూవీస్ పతాకంపై ఏఎం రత్నం నిర్మించిన ఈ సినిమాను మోహన గాంధీ డైరెక్ట్ చేశారు. విజయశాంతి, వినోద్ కుమార్ ప్రధాన పాత్రల్లో నటించారు. పోలీసు అధికారిణిగా రాములమ్మ అందర్నీ మెప్పించారు. ఎస్‌ఐ శిరీష తండ్రి ఈ సినిమాను ప్రేరణగా తీసుకున్నట్లు చెప్పడంతో విజయశాంతి ఆనందం వ్యక్తం చేశారు.
